Elmoarekhhالسلام عليكم ورحمة الله وبركاته.. ازيك يا صديقي؟ أخبارك إيه يارب تكون بخير.. وحشتك أنا عارف.. عشان كده أنا مجيتش وإيدي فاضية.. جايبلك معايا دولة جديدة من دول إسلامية ماتعرفهاش.. الجزء الرابع.. والنهاردة ميعادنا مع دولة حكمت لمدة 130 سنة.. منهم 41 سنة تأسيس بس.. يعني استمر تأسيسها حوالي 41 سنة.. 41 سنة بتتبني يعني زيادة عن حكم مبارك بحوالي 11 سنة بس.. وهي أول دولة علوية هاشمية تقوم في التاريخ الإسلامي كله.. فترة قوتها كانت 30 سنة بس.. وفترة ضعفها كانت 59 سنة.. النهاردة معادنا مع دولة الأدَارسة.. ومكانوش ساكنين في الدراسة لأ….. ههههه
---
السبب
بعد ما قدر العباسيين من القضاء على ثورة الحسين بن علي بن الحسن في معركة فخ، كان فيه واحد اسمه إدريس بن عبد الله بن حسن بن الحسن بن علي بن أبي طالب، وده كان من العلويين اللي العباسيين قدروا يقضوا على ثورتهم، الراجل ده تمكن من الهرب من تحت إيد العباسيين مع مَولاه راشد لمصر، ومن مصر طلع على المغرب الأقصى اللي هي المغرب حالياً، واستقر في مدينة وَلِيلَى المغربية، وهناك كان فيه واحد اسمه إسحاق بن محمد بن عبد الحميد زعيم قبيلة "أوربة" البربرية.
اللي بالمناسبة كانت رفضت الطاعة والانصياع للعباسيين.. من الآخر ما اعترفوش بيهم ولا بولايتهم.. بعد ما كان والي بأمر من العباسيين.. بس ده بعد ما اتعرف على إدريس بن عبد الله بن حسن بن الحسن بن علي بن أبي طالب.. الراجل ده في تصرف غريب تنازل لإدريس عن الحكم.. بعد ما عرف معلومة صغيرة وهي نسبه وصلته بالنبي عليه الصلاة والسلام.. ومن هنا بدأت الومضة البسيطة لتأسيس دولة الأدارسة نسبة إلى إدريس بن عبد الله.. واستقرت الأمور لإدريس بن عبد الله، وقربت منه معظم قبائل البربر، وبدأ يطمح لمدِّ نفوذه وسلطانه لقبائل التي تعترف بحكمه، وبدأ ينشر الإسلام بين القبائل التي لا تزال على المجوسية أو اليهودية أو المسيحية، فدخل كثيرٌ من أهل هذه البلاد الإسلام. وبدأ يأسس لقيام دولة مستقله جديدة، وفجأة إدريس بن عبد الله بيموت مسموم ومكانش عنده أولاد ولا ورثة، فمين اللي هيتولى الحكم؟ بالظبط يا صديقي، مولاه راشد اللي هرب معاه لمصر ومن مصر للمغرب، ليه بقا؟
عشان إدريس كانت مراته حامل في إدريس، لأ هو بجد إدريس خلف إدريس الثاني، يعني ابنه ساعتها كان لسه جنين لما هو مات مسموم، وبعدها بشوية راشد اللي تولى حكم الدولة الإدريسية اتقتل، وهنا مبقاش فيه حد يحكم بجد، لكن كان فيه واحد اسمه إدريس أبو خالد بن إلياس العبدي- من أحد شيوخ البربر- كفل إدريس اللي هو ابن إدريس اللي مات مسموم.. أنا دلوقتي مش مستغرب ليه الدولة اسمها الأدارسة.. لحد ما كبر إدريس الثاني بن إدريس بن عبد الله واستقل بالحكم بنفسه سنة 192 هـ/ 808م.
---
التاريخ
عشان كده يا صديقي مش لازم تستغرب لما اقولك إن تأسيس الدولة دي استمر 41 سنة كاملين، لكن إدريس الثاني من بداية حكمه بدأ يتحرك بسرعة، وبنى عاصمة جديدة لدولته وسماها (فاس) اللي هي مدينة لحد دلوقتي في المغرب، وبدأ يتوسع في فتوحاته بشكل مبكر، وضم المغرب الأوسط اللي هي الجزائر وسعى بشكل شديد للقضاء على نفوذ الخوارج، والمؤرخين بيقولوا إن دولة الأدارسه وصلت لقمة قوتها ومجدها في عهد إدريس الثاني، وابتداءً من سنة 197هـ= 812م بدأ إدريس سلسلة حملات ثبَّتت سلطان الدولة من أول تلمسان لحد ساحل المحيط الأطلسي، وحارب الخوارج في جبال أطلس، ودارت حروب طويلة بينه وبين البرغواطيين، ودي إمارة نشأت في القرون الوسطى على الساحل الأطلسي للمغرب، وفي الدور ده من تاريخ الأدارسة العبء الأكبر كان على رجال قبيلتي أوربة وغمارة بشكل خاص. لحد ما توفى إدريس الثاني عام 213هـ= 828م بعد ما قدر يتغلب على كل الحروب والمؤامرات اللي تمت عليه..
وبعد وفاته تولى الحكم ابنه وخليفته محمد بن إدريس الثاني وع بداية حكمه بيتصرف تصرف غريب جداً وغير معقول، والتصرف ده كان بناءً على نصيحة جدته (كنزة) عمل إيه بقا؟ قسم الدولة بين إخواته واخواته دول كانوا كتير جداً، والمعقول أو اللي كان لازم يحصل أن يقيمهم عمالاً أو ممثلين للدولة يعني كلهم في النهايه تحت إمرته، لكن هو قرر يقسم الدولة بينهم.. وده اللي هيخلي جوا الدولة دول صغيرة ذات حكم مستقل.. بالتالي الدولة هتضعف.. وبالفعل البعض من اخواته بدأوا يستقلوا بالحكم بشكل منفرد.. ونسوا تماماً إن القوة في الجماعة.. لكن كعادة العلويين يعني مش جديدة عليهم.. التفرقة.
وتوفي محمد بن إدريس الثاني عام 221هـ= 836م وخلفه ابنه علي بن محمد وكان سيء السيرة فقامت عليه ثورة من عامة الناس.. علي خفى ناس استخبى في الأندلس لحد الفتنة ما تهدى وفجأة بيموت.. ولما مات بيخلفه ابنه يحيى وهوب ويستولي عبد الرحمن بن أبي سهل -الذي تزعم الثورة- على مدينة فاس، فزوجة يحيى بن علي بعتت لابوها علي بن عمر بن إدريس، وطلبت منه الحضور لإخماد هذه الثورة فجاء وأخمدها، وسيطر على البلاد.. وفضل الأدارسة مستمرين في الحكم بين الاستقرار والضعف وتوالي الحكام على عرش الدولة لحد ما بنوصل لواحد اسمه الحسن الحجام اللي اتقبض عليه من الأمويين سنة 974 م 311 هجرية
---
بالنهاية
وبتتنتهي قصة دولة الأدارسة وبتنتهي حلقتنا.. بس إن شاء الله ما تنتهيش لمتنا ولحد ما نتجمع تاني
اعمل لايك وشير ولو انت على اليوتيوب اشترك على القناة.للحصول علي الفيديو اضغط هنا
